«Автотест» компанияси юридик шахслар ҳайдовчиларини ўқитиш фаолиятини тўхтатишини маълум қилди. Бу ҳақда компания сайтида хабар қилинди.

«Биз жамоамиз билан шу қарорга келдик. Бизнинг бош мақсадимиз пул ишлаш эмаслигини, бизда қадриятлар бошқа эканлигини шу билан намоён этмоқчимиз. Биз одамлардан қинғир йўл билан пул ишлашдан йироқмиз», — дейилади баёнотда.

Хабарда қайд этилишича, «Автотест» компанияси пайдо бўлганидан бери ҳали бирор марта даромад олгани йўқ. Ҳамма топилган даромад фақат ва фақат ривожланишга, янги замонавий мактаблар барпо этиш, дастурлар, янги технологиялар яратишга йўналтирилди. Бор куч ва меҳнат асосий бош ғоя — одамлар ўлимини камайтириш, йўлларда тартиб бўлишини таъминлаш ва ушбу соҳанинг ривожланиши учун сарф этилди.

«Бизда қадриятлар бошқа. Бизда таҳсил олганларнинг бирортаси таълим сифатига, методига, яратилган шароитга эътироз билдира олмади, ҳеч бир ўқувчи шикоят қилмади, қилолмайди ҳам. Чунки биз халқ хизмати учун жонимизни бериб ҳаракат қилдик. Шу орқали бирор бир инсон ҳаётини сақлашга ҳисса қўшган бўлсак, йўлларда бизнинг битирувчиларимиз озгина бўлса-да тартибли ҳаракатланаётган бўлса, шунинг ўзи бизга катта бахт. Бизнинг ютуғимиз мана шу», — дейилади баёнотда.

Компания жамоаси «Автотест» компанияси юридик шахслар ҳайдовчиларини ўқитиш фаолиятини тўхтатиши, бундаён буён фақат ҳайдовчиларни тайёрлаш, методика ва қўлланмалар яратиш билан шуғулланишини маълум қилди. «Биз таҳқирлардан чарчадик», — дея давом эттиради жамоа.

Эслатиб ўтамиз, аввалроқ Ўзбекистон Монополияга қарши курашиш қўмитаси 1 августдан эътиборан юридик шахсларга тегишли автотранспорт воситаларини бошқараётган ҳайдовчилар ҳар икки йилда «Avtotest Report» МЧЖда малака оширишлари кераклиги тўғрисидаги хабарлар бўйича тушунтириш берганэди.