Ўзбекистон президенти Шавкат Мирзиёев 23 июль куни кичик бизнес, а тадбиркорликни ривожлантириш масалаларига бағишланган видеоселектор йиғилишида тадбиркорларни қўллаб-қувватлаш бўйича ишларни кучайтиришга чақирди.
Давлат раҳбари вилоят, туман ва шаҳар ҳокимлари ҳамда уларнинг биринчи ўринбосарлари бутунлай янгича ишлашлари, ўз вақтларининг 70 фоизини тадбиркорликни ривожлантиришга қаратиши лозимлигини таъкидлади.
«Бу ҳам бир тарихий йиғилиш. Агар биз тадбиркорни қўллаб-қувватламасак иқтисодиёт ишламайди, келгуси йили тўхтаб қоламиз бу ривожланишдан. Биз катта марра олдик. Заминимиз бой, одамларимизни бой қилиш имкониятимиз бор. Ишчи жойи орқали. Даромад топиш ўзимизнинг қўлимизда. Жуда катта сабр-тоқат, матонат, Ватанга садоқат билан ишласак натижа бўлади. Шунинг учун бир ҳафтада уч кун тадбиркор билан ишлаш вақт-соати келдими-йўқми? Бу янги тизим. Юрагимнинг дарди, армонлари бу. Имкон бор», — дея таъкидлади у.
Аввалроқ президентнинг «асосли зарурат бўлмаган ҳолда тадбиркорларга тегишли мол-мулкни бузишга умуман йўл қўйилмаслиги зарур ва шарт», — дея барча ҳокимларни қатъий огоҳлантиргани хабар қилинган эди.
