Ўзбекистон президенти Шавкат Мирзиёев раислигида 23 июль куни кичик бизнес ва тадбиркорликни янада ривожлантириш масалаларига бағишланган видеоселектор йиғилиши ўтказилди, дея хабар қилди «Ўзбекистон 24» телеканалининг «Янгиликлар 24» дастури.
Йиғилишда президент фаолиятини вақтинчалик тўхтатган ёки ишламаётган кичик бизнес корхоналари сони катта эканини таъкидлади. Текширув ўтказилган 4000 та фаолият кўрсатмаётган корхонанинг 36 фоизи айланма маблағлар ва кредит олиш учун гаров йўқлиги, 17 фоизи эса ер ва бино ажратиш, қурилиш ва муҳандислик тармоқларига уланиш, қарздорлик билан боғлиқ муаммолар сабабли фаолиятини тўхтатгани аниқланди.
Бу каби муаммоларнинг аксарияти, айниқса ер, бино ва рухсатнома олиш масалаларини жойида ҳал қилса бўлади, деди давлат раҳбари. У ҳокимлар ва уларнинг биринчи ўринбосарлари янгича ишлаши кераклигини таъкидлади.
Вилоятлар, туман ва шаҳарлар ҳокимлари ҳамда уларнинг биринчи ўринбосарлари фаолиятини янги ёки қайта ташкил этилаётган кичик корхоналар, яратилаётган иш ўринлари сонидан келиб чиққан ҳолда баҳолашни кўзда тутган янгича тизимни жорий қилиш вазифаси қўйилди. Корхоналар умрининг давомийлиги ҳам ҳисобга олинади.
Бугунги кунда кичик бизнес мамлакат ялпи ички маҳсулотининг қарийб 60 фоизини, саноат маҳсулотлари ҳажмининг учдан бирини, қишлоқ хўжалиги маҳсулотининг 98 фоизини, инвестицияларнинг ярмини таъминламоқда. Кўпгина вилоятларда экспортнинг 70−90 фоизи айнан кичик бизнесга тўғри келади, дея қайд этди давлат раҳбари матбуот хизмати.
