Самарқанд вилоятида истиқомат қилувчи Шукрулло Панжиев (исм-фамилиялар ўзгартирилди) 2015 йилнинг сентябрь ойида мактабга ҳисобчи вазифасига ишга кирганди. Кўп ўтмай у шу мактаб ўқитувчиси, икки фарзанднинг онаси Анзират Орзиева билан яқин бўлиб қолди. А. Орзиева эри билан ажрашган, боши очиқ эди. Аввалига улар телефон орқали тез-тез гаплашиб туришди. Орадан кўп ўтмай…
Шукрулло Анзиратнинг уйига, ота-онасининг олдига бориб, унинг уйидагилари билан танишиб, ниятини айтади. Бунга улар ҳам эътироз билдирмагач, у Анзират билан шаръий никоҳ ўқитиб, бирга яшай бошлади.
Шукруллонинг Анзират билан бирга яшаши турмуш ўртоғи Гулсанам Ҳаққулованинг ҳам қулоғига етиб боради. У эрининг хиёнат кўчасига кирганини эшитиб, юраги аламга тўлади. Жаҳли устида болаларини олиб, отасиникига кетиб қолади. Шундан сўнг орадан бир неча ойлар ўтса-да, Гулсанам уйга қайтишни хаёлига келтирмайди. Охир-оқибат Шукруллонинг опа-сингиллари, янгалари ўртага тушади. Аммо Гулсанам эрининг қилмишини кўнглига қаттиқ олганидан оиласига қайтмайди. Бунинг ўрнига у энди эри билан ҳеч қачон бирга яшамаслигини айтиб, болаларига алимент пули ундириш мақсадида судга мурожаат қилади. Г. Ҳаққулованинг қонуний мурожаати суд томонидан қаноатлантирилади. Ш. Панжиевдан фарзандларига ойлик иш ҳақининг эллик фоизи миқдорида алимент пули ундирилади.
Қисқаси, хотини болалари билан кетиб, ҳовли ҳувиллаб қолгач, Ш. Панжиев иккинчи хотинини болалари билан бирга кўчириб келади. Анзиратнинг қизи вояга етганди. Шукрулло уни турмушга узатишга бош-қош бўлади. Тўйдан сўнг бир ойча бирга яшаган Анзират тўсатдан аразлаб отасиникига кетиб қолади. Бунга Шукруллонинг асоссиз рашки сабаб бўлди.
Ўтган йилнинг 25 декабрь куни эди. Иккинчи хотинининг ҳам кетиб қолганидан ўзини қаерга қўйишни билмай юрган Шукрулло Каттақўрғон шаҳрига Анзират ишлайдиган мактабга боради. У Анзиратни учратгач, уйга қайтишни, бирга яшашни айтади.
Аммо у А. Орзиеванинг рад жавобини эшитгач, қўрқитиб қўйиш мақсадида ёнидаги болтани қўлига олади. Буни кўрган Анзират ҳамла қиляпти, деган хаёлга боради-да, болтанинг тиғини қўли билан ушлайди. Шундан сўнг икки ўртада жанжал келиб чиқади. Бунинг оқибатида А. Орзиева боши тепа соҳаси, чап тизза бўғимида шилинма, чап қўл кафти, бурун ва ўнг қўл тирсак соҳаларида кесилган яралар, бурун, ўнг қўл бешинчи кафти суяги ва ўнг тирсак суягининг очиқ синиши каби тан жароҳати олади.
Ш. Панжиевнинг бу қилмиши аввало унинг ўзига қимматга тушди. Суд уни Жиноят кодексининг 105-моддаси 1-қисмида назарда тутилган жиноятни содир этганликда айбдор деб топди. Унга нисбатан уч йил муддатга озодликни чеклаш жазоси тайинлади.
Илҳом Ҳамидов,
жиноят ишлари бўйича Самарқанд вилояти судининг судьяси
