Чет эллик сайёҳларга қулайлик яратиш ва сифатли хизмат кўрсатиш мақсадида Бибихоним масжидининг олдида барча шароитларга эга дастлабки биоҳожатхона фаолият кўрсатмоқда. Бу ҳақда Zarnews.uz сайти орқали хабар берди.

Биоҳожатхоналар санитария қоидалари, меъёрлари ва гигиена нормативларига мувофиқ келувчи замонавий санитария-гигиена жиҳозлари (сув таъминоти, вентиляция тизими, ички ва ташқи ёритиш тизими, қўл ювиш ва гигиеник мосламалар, сантехника жиҳозлари ва бошқалар) билан тўлиқ таъминланган бўлиши керак. Шунингдек, уларда таҳоратхона ҳамда ногиронлар учун ҳам барча қулайликлар яратилиши лозим.

— Ҳозирда Самарқанд шаҳрида битта биоҳожатхона фаолияти йўлга қўйилган, — дейди вилоят туризмни ривожлантириш департаменти бош мутахассиси Фаррух Ҳамроев. — Жорий йилнинг якунига яна 30 та замонавий санитария-гигиена шохобчалари қурилиш режалаштирилган. Шунингдек, президентнинг 2019 йил 5 январдаги «Туризм тармоғини жадал ривожлантиришга оид чора-тадбирлар тўғрисида"ги қарорига кўра, тадбиркорлик субъектларига намунавий, шу жумладан тармоқли лойиҳалар асосида замонавий санитар-гигиеник шохобчаларни қуриш учун 80−100 квадрат метр ўлчамда ер участкаларини электрон аукционга қўймасдан олиш учун Ўзбекистон Республикаси Туризмни ривожлантириш давлат қўмитасининг илтимосномасига кўра устуворлик ҳуқуқи тақдим этилган эди. Ушбу имкониятдан фойдаланган ҳолда М-37 автомагистрал йўли бўйида Иштихон, Каттақўрғон Нарпай, Пахтачи туманларидан ташаббускор тадбиркорлар санитария гигиена шохобчалари қуриш бўйича ўз таклифларини билдирган.