Nestlé Uzbekistan Франциянинг Lactalis халқаро концерни билан сув ва сут маҳсулотларини ишлаб чиқариш бўйича бизнесини сотиш тўғрисидаги битимни имзолади. Бу ҳақда компаниянинг 16 июлда эълон қилинган пресс-релизида сўз боради. Баёнотда шартнома қиймати келтирилмаган.
Келишув шартларига кўра, Nestlé`нинг Ўзбекистондаги сув ва сут маҳсулотларини ишлаб чиқариш бўйича бизнеси, жумладан Намангандаги иккита фабрика Lactalis мулкига айланади. Келишув якунлари бўйича компания Lactalis билан Ўзбекистонда Nestlé`нинг глобал брендлари — Nesquik, Nido ичимликлари ҳамда Nestlé Pure Life сувларини ишлаб чиқариш бўйича лицензион битим имзоланади.
«Lactalis — сут маҳсулотлари тоифасида дунёнинг энг етакчи ишлаб чиқарувчиларидан бири. Ўзбекистондаги келишув натижасида биз Nestlé брендлари остида сут тоифаси ва сув тоифасида маҳсулотлар ишлаб чиқаришда кучли ҳамкорга эга бўламиз», — дея қайд этди Nestlé`нинг Россия ва Евроосий минтақасидаги раҳбари Марсиаль Роллан.
Nestlé Ўзбекистон бозорига ўз маҳсулотлари, жумладан қандолат маҳсулотлари, кофе ва болалар озуқаларини етказиб беришда давом этади.
2017 йилнинг ноябрида Nestlé Uzbekistan Тошкентдаги ичимлик сувини ишлаб чиқариш бўйича заводини сотган эди.
