1 сентябрдан «UzHD» базасида Ўзбекистон Миллий телерадиокомпанияси қошидаги «O‘zbekiston tarixi» канали ишга туширилади. Бу президентнинг 11 июлдаги қарорида кўзда тутилган.
Телеканал HD форматида эфирга узатилиб, республиканинг бутун ҳудуди бўйлаб тарқатиладиган рақамли кўрсатувнинг ҳаммабоп ижтимоий пакети таркибига киритилади.
Янги канал Ўзбекистоннинг кўҳна ва бой тарихи, Ўзбекистон халқининг жаҳон цивилизацияси ривожига қўшган ғоят катта илмий, маданий ва маънавий ҳиссаси ҳақида мамлакат аҳолисини, шунингдек, чет эл жамоатчилигини кенг кўламда хабардор қилиш билан шуғулланади.
Каналда тарихнинг барча даврларини чуқур илмий тадқиқотларнинг холисона натижалари асосида кўрсатиб берувчи илмий-оммабоп дастурлар, ҳужжатли ва бадиий фильмлар, ахборот-таҳлилий ва мавзули телекўрсатувлар, ток-шоу, «давра суҳбатлари» намойиш этилади.
Ўзбекистон тарихи бўйича илмий тадқиқотлар натижалари, маданий ва кўҳна ёдгорликларни сақлаш билан боғлиқ муаммолар, шунингдек, Ўзбекистон халқи тарихига тааллуқли ва умуммиллий аҳамиятга эга бўлган бошқа ғоят муҳим масалаларни очиқ муҳокама қилиш учун олимлар, тарихчилар, тадқиқотчилар, ўқувчи-ёшлар ҳамда кенг жамоатчилик вакиллари таклиф қилинади.
Бундан ташқари, каналда чет элларга ижодий сафарлар давомида Ўзбекистон халқининг моддий ва номоддий мероси, мамлакат тарихи билан боғлиқ бўлган нодир қўлёзмалар, китобларни излаш, амалий санъат буюмлари ҳамда музейлар коллекцияларида, хорижий давлатларнинг илмий марказларида, шунингдек, жаҳон тарихий меросини ўрганаётган жамғармаларда сақланаётган қимматли топилмаларни ўрганиш натижалари бўйича махсус телекўрсатувлар тайёрланади.
