1 июндан Тошкент циркида капитал реконструкция ишлари бошланди, дейилади пойтахт ҳокимияти матбуот хизмати репортажида. 700 минг кв. м майдонни қамраб оладиган реконструкция ишларига 46,63 млрд сўм сарфланади.
Қурилиш бригадаси омборхона бинолари ва жониворлар учун отарлардан цирк маркази — манежга томон ҳаракатланмоқда. Комплекс реконструкция доирасида ҳаво алмаштириш, иситиш тизимлари, электр симлари, оқава сувлар тизими, томлар, эшиклар ва гримерлар алмаштирилади, моддий-техник база янгиланади.
Таъмирлаш-қурилиш ишларини 305 кун давом эттириб, циркни 2020 йилнинг мартида очиш режалаштирилмоқда.
Репортажда қайд этилишича, сўнгги йилларда цирк томошабинлари кескин камайди. Бунга бошқарув тизимининг эскиргани, томоша дастурлари сонининг қисқаргани, ходимларга кам маош берилиши, ёш ходимларнинг етишмаслиги, жониворларни сақлаш бўйича кучсиз моддий-техник база кабилар сабаб бўлган.
