«Ўзбекистон ҳаво йўллари» Миллий авиакомпанияси флоти бешинчи Boeing 787−8 Dreamliner самолёти билан тўлдирилди, дея хабар қилди МАК матбуот хизмати. Янги лайнер 2 июль куни кечқурун Сиэтлдан 12,5 соатлик тўхтовсиз парвоздан сўнг Тошкент аэропортига қўнди.

Самолётни «Ўзбекистон ҳаво йўллари» Парвоз мажмуаси учувчи инспектори Иосиф Зак ҳамда Boeing 787 командири Малик Аҳмедов бошқари келди. Авиацион анъанага кўра, лайнер ўт ўчириш машиналари брандспойтларидан отилган сув фавворалари билан қарши олинди.

Авиакомпания матбуот хизматининг хабар қилишича, самолёт Тошкентга учиб келишдан аввал Boeing компаниясининг Эвереттедаги аэродромида учиш ва қўниш синовларидан ўтказилган. МАКнинг парвоз ва техник ходимларидан иборат мутахассислар жамоаси бешинчи «Орзудаги лайнер"ни қабул қилиб олди. Синов парвозлари вақтида авиалайнернинг барча механизмлари текширилиб, зарур жараёнлар амалга оширилди.

Янги самолётга аввалги тўртта Boeing 787−8 Dreamliner самолёти каби GE Аviation компаниясининг ёнилғи сарфлаш самарадорлигини ошириш, шовқин даражасини пасайтириш ва атмосферага CО2 газининг ажраб чиқишини камайтириш имконини берувчи GEnх-1B двигателлари ўрнатилган.

Авиалайнер бизнесда — 24та, эконом классда — 222та ва жами 246та йўловчини ташишга мўлжалланган. Самолёт саҳни қулай ва кенг ўриндиқлар, янги пол қопламлари, ёритиш ва товуш изоляцияси, индивидуал кўнгилочар дастурли HD сенсор мониторлар билан таъминланган. Иллюминаторлар баландлиги 46 см ни ташкил этиб (барча тижорий лайнерлар орасида рекорд), улар бошқарилувчи электрохром қоронғилаштириш технологияси билан таъминланган.

Лайнерга интернетга кириш ускуналари ўрнатилган. Бу Uzbekistan Airways компаниясининг тўртинчи «Бортда интернет» хизматидан фойдаланиш мумкин бўлган ҳаво кемасидир. Panasonic Avionics Corporation алоқа провайдери ва кўнгилочар тизимлар етказиб берувчиси ҳисобланади.

Миллий авиакомпания 2016 йил сентябридан «Дримлайнер"лардан тижорий мақсадларда фойдаланишни бошлади. МАК ихтиёрига яна бир худди шундай самолёт келиб қўшилиши лозим.