Россиянинг учта ишбилармонлик нашри — «Ведомости», «Коммерсантъ» ва «РБК» — 10 июнь куни «Медуза» журналисти Иван Голуновни қўллаб-қувватлаб бир хилдаги биринчи саҳифа билан чоп этилди. Бу ҳақда «Ведомости» газетаси хабар қилди.
Муқовага «Мен/Биз Иван Голунов» ёзуви туширилган. Мазкур жумла Франциянинг Charlie Hebdo сатира нашри таҳририятида отишма содир этилганидан сўнг бутун дунёда айблов рамзига айланган Je suis Charlie (Мен — «Шарли») шиорининг муқобили ҳисобланади.
Бундан ташқари, учта газета таҳририяти қўшма мурожаатини ҳам эълон қилди. Унда тергов ҳаракатларини олиб боришда максимал даражада шаффофликни таъминлаш, жумладан қўлга олишда иштирок этган ИИВ ходимларининг ҳаракатларини батафсил ўрганиш талаб қилинган.
«Медуза» мухбири 6 июнь куни гиёҳанд моддалар савдосида гумонланиб қўлга олинган эди. Иван Голунов топилган гиёҳвандлик моддалари унга тегишли эмаслигини ва айбни тан олишдан бош тортишини маълум қилди. «Медуза» таҳририяти ҳибсга олиш Голуновнинг касбий фаолияти билан боғлиқ эканига ишонч билдирди.
Шанба куни Москванинг Никулин суди журналистга нисбатан икки ой муддатга уй қамоғи кўринишидаги эҳтиёт чораси қўлланилиши тўғрисида ҳукм чиқарди.
