Душанба куни тахминан 9:00 да Тошкентдаги «Новза» метроси яқинида қурилган йўл ўтказгичда содир бўлган йирик ЙТҲ Бунёдкор шоҳ кўчасида бир соатдан ортиқроқ вақт давомида тирбанликларга сабаб бўлди.
Ҳодиса гувоҳларининг «Газета.uz"га маълум қилишича, «Халқлар дўстлиги» метросидан Мирзо Улуғбек метроси томонга биринчи ҳаракат йўлаги бўйлаб ҳаракатланиб келаётган Nexia автомобили ҳайдовчиси тушишда узлуксиз чизиқ орқали иккинчи йўлакка ўтиб кетади ва Howo юк машинаси билан тўқнашади. Тўқнашувдан сўнг енгил автомобиль учинчи полосага чиқиб кетиб, яна бир Howo юк машинаси билан тўқнашади.
Натижада Nexia ажратувчи тўсиқ устидан қарама-қарши йўналишга чиқиб кетиб, ағдарилади. Қарши томонда учинчи йўлакдан келаётган Spark ҳайдовчиси тўқнашувдан қочишга уриниб, биринчи йўлакда ҳаракатланаётган Matiz билан тўқнашади.
Йўл ўтказгич Google харитасида.
Авариядан сўнг ҳар икки томонда биттадан ўтиш йўлаги очиқ қолиши оқибатида тирбандлик пайдо бўлди. Ҳайдовчилар ЙТҲ жойини айланиб ўтишга ҳаракат қилгани боис йўл ўтказгич остида ҳам тирбандликлар вужудга келди.
«Газета.uz"га маълум бўлишича, аварияга сабабчи бўлган Nexia ҳайдовчиси тан жароҳатлари олган, бошқа жабрланувчилар йўқ.
2017 йилнинг кузида очилган йўл ўтказгичда биринчи марта ЙТҲ содир бўлаётгани йўқ. Тезлик ҳар икки томонда ҳам соатига 50 км этиб белгиланганига қарамасдан (тезлик назоратга олинмаган), бу ерда тезликни ошириш ва Йўл ҳаракати қоидаларининг бошқа бузилиши ҳолатлари тез-тез кузатилади.
