Спорт арбитраж суди (CAS) ўзбекистонлик оғир атлетикачи Руслан Нуриддинов (105 кг гача) ва беларуслик Николай Новиковни (85 кг гача) 2012 йилда Лондонда бўлиб ўтган Олимпия ўйинларида антидопинг қоидаларини бузганликда айбдор деб топди.
Спортчилар нопинг-намуналарининг такрорий текшируви уларнинг пешобида туринабол мавжудлигини кўрсатди. Николай Новиков намунасида станозолол ҳам аниқланди. Лондон Олимпиадасида оғир атлетикачилардан олинган допинг-намуналари 2018 йил декабрида текширилганида, ижобий натижа берган эди.
Оғир атлетикачиларнинг Олимпиадада эришган натижалари, жумладан баллари бекор қилиниб, медал ва совринлари мусодара этилади. Спортчилар иши кейинги чораларни кўриш учун Халқаро оғир атлетика федерациясига тақдим этилди.
Руслан Нуриддинов Олимпиада-2012 да 105 кг гача вазнда тўртинчи ўринни қўлга киритган эди. У Рио-де-Жанейрода олимпия чемпиони, 2013 йилги жаҳон чемпионати ғолиби, 2018 йилги Осиё ўйинлари олтин медаль соҳиби ҳамдир.
Халқаро олимпия қўмитаси 2008, 2012 ва 2014 йилги Ўйинлар иштирокчилари допинг-намуналарини кенг миқёсда қайта текширувдан ўтказиб, бир қанча ўзбекистонлик спортчиларнинг антидопинг қоидаларини бузганлигини аниқлади ва уларнинг олимпия натижаларини бекор қилди.
Аввалроқ 2008 ва 2012 йилги Олимпия ўйинлари допинг-намуналарини қайта текширувдан ўтказгач, Халқаро олимпия қўмитаси Артур Таймазовни Пекиндаги олтин, Сослана Тигиевани кумуш медалидан маҳрум этган эди.
