28 май куни Тошкентда «ОАВ соҳасида миллий қонунчиликни янада такомиллаштиришнинг долзарб масалалари» республика анжумани бўлиб ўтди, дея хабар қилди «Газета.uz» мухбири.
Унда иштирок этиш учун журналистлар, блогерлар, депутатлар, давлат органлари раҳбарлари ва дипломатлар таклиф этилди. Ахборот ва оммавий коммуникациялар агентлиги томонидан ташкил этилган анжумандан кўзланган мақсад — ҳокимият очиқлигини таъминлаш ва унинг ОАВ билан алоқаларини яхшилашдан иборат.
Тадбирда журналистлар ҳуқуқларини ҳимоя қилиш, аҳоли ва журналистлар фикрлари, таклиф ва тавсияларини ўрганиш учун қайта алоқа каналларини ташкил этиш масалалари муҳокама қилинди.
«Биз ОАВларимиз ҳақиқатдан ҳам ҳокимиятнинг мустақил тармоғига айланиши учун уларни ривожлантиришга ҳаракат қилмоқдамиз», — деди агентлик директори Комил Алламжонов кириш сўзида.
Тадбир иштирокчилари бугун Ўзбекистонда ОАВнинг давлат томонидан қўллаб-қувватланишида ва давлат ҳокимияти органлари матбуот хизматлари фаолиятида муаммолар мавжудлигини қайд этди.
«Биз масс-медиа жамиятда катта роль ўйнашини ҳамда давлат ва аҳоли ўртасида кўприк вазифасини бажаришини тушуниб етишимиз керак. Ўртамиздаги алоқалар қанча яхши йўлга қўйилса, мамлакат шунча тараққий этади. Бугун давлат идоралари жавобгар бўлган кўплаб муаммоларимиз бор», — деди агентлик директори ўринбосари Саида Мирзиёева.
«Айрим давлат органлари сайтларига назар ташласак, бир ойда 400, бир йилда эса 3000 мингдан ошиқроқ киши кирганини кўрамиз. Бу статистика иш қониқарсиз олиб борилаётганини кўрсатади. Шунинг учун одамлар ўзларини қизиқтирган маълумотларни олиш учун хориж сайтларига кираётганларини кўраяпмиз. Агарда давлат органи раҳбари ўз фаолиятида муваффақият қозонишни хоҳласа, у масс-медиа билан ишлашга диққат қаратиши керак», — дея қўшимча қилди Саида Мирзиеёва.
Муаммоларни ҳал этиш бўйича чора-тадбирлар белгиланди: 2019−2020 йилларда Ахборот ва оммавий коммуникациялар агентлиги медиа-омбудсман лавозимини жорий этишни режалаштирмоқда, давлат органларининг жамоатчилик билан алоқаларини яхшилаш соҳасидаги қонун лойиҳасини тайёрламоқда, Журналистлар касб этикаси кодексини ишлаб чиқмоқда.
Анжуманда Олий Мажлиснинг Инновацион ривожланиш, ахборот сиёсати ва ахборот технологиялари масалалари бўйича қўмитаси раиси Илҳом Абдуллаев, «Открытые данные» компанияси директори Андрей Хорсев (Украина), ЭОАВМА раиси Фирдавс Абдуҳолиқов, ЮНЕСКОнинг Ўзбекистондаги ваколатхонаси раҳбари вазифасини в. б. Фуад Пашаев ва бошқа спикерлар сўзга чиқди.
