Ўзбекистон халқ таълими вазири Шерзод Шерматов мактаб битирувчилари, уларнинг ота-оналари ва педагогларни мактабни тамомлаётганлари билан табриклади.
«Бугун республикамиздаги барча мактабларда „Сўнгги қўнғироқ“ янграб, 279 минг нафар ўқувчиларимиз 11 йиллик таълим тизимига қайта ўтганимиздан кейинги илк битирувчиларга айланадилар. Уларнинг ҳаётида янги саҳифа очилиб, катта ҳаётга учирма бўлишади», — дейилади вазирнинг Facebook ижтимоий тармоғида эълон қилинган табригида.
Шерзод Шерматов битирувчиларга мурожаат қилар экан: «Бугун сизларнинг ҳаётингизда энг қувончли кун. 11 йил мобайнида бир партада ёнма-ён ўтирган, бир оила аъзоларидек бўлиб қолган синфдошларнинг ҳар бири эртадан бошлаб ўзининг шахсий ҳаётини қуришга киришади. Кимдир таҳсилни олий ўқув юртида давом эттирса, яна кимдир ҳалол меҳнати билан оиласига қанот бўлади», — деди.
«Қаерда бўлманг, мактаб партасида олган билимларингиз сизга қўл келишига, келгусида уларни янада мустаҳкамлаб боришингизга умид қиламан. Ватанимиз ривожи учун ўз ҳиссангизни қўшишингизга аминман», — деди вазир.
Шерзод Шерматов президент Шавкат Миромонович Мирзиёев бошчилигида халқ таълими тизимида катта ислоҳотлар даври бошланганини, шунингдек, ҳали олдинда бажарилиши лозим бўлган улкан вазифалар кўп эканини таъкидлаб ўтди. Бу борада яқинда қабул қилинган Ўзбекистон Халқ таълими тизимини 2030 йилгача ривожлантириш Концепцияси дастуриламал бўлади.
ХТВ матбуот хизматининг «Газета.uz"га маълум қилишича, 25 май куни вазир ўзи ўқиган Тошкентнинг Олмазор туманидаги 22-мактабда ўқув йили якунланаётганига бағишланган маросимда иштирок этди.
