13−18 май кунлари губернатор Фил Брайант бошчилигида АҚШнинг Миссисипи штати делегацияси Ўзбекистонга ташриф буюради, дея хабар қилди ТИВ матбуот хизмати. Аввалроқ Фил Брайант давлатлар ўртасидаги дипломатик алоқалар ўрнатилган вақтдан буён Ўзбекистонга ташриф буюрган илк Америка штати раҳбарига айланиши ҳақида хабар берилган эди.
Делегация таркибидан штатнинг расмий, ишбилармон ва академик доиралари вакиллари ўрин олган. Улар орасида штатни ривожлантириш Маъмурияти ижрочи директори Глен Маккалоу, қишлоқ хўжалиги ва савдо бўйича комиссар Энди Гибсон, Миллий гвардия қўмондони, генерал Женсон Бойлз, Алкорн университети президенти Донзел Ли, Клинтон шаҳри мэри Фил Фишер, Миссисипи штати университети вице-президенти Жули Жордан, шунингдек тўқимачилик, пахтачилик ва саноат соҳаларидаги Миссисипи компаниялари раҳбарлари ўрин олган.
Америка делегацияси Ўзбекистондаги қатор вазирлик ва идоралар раҳбарлари билан музокаралар ўтказади. Ўзбекистон Қуролли кучлар академияси ҳамда миссисипилик Дэн Петтерсон — Silver Leaf International компанияси раҳбари иштирокида ташкил этилган пахта кластери фаолият кўрсатаётган Жиззах вилоятининг Пахтакор туманига ташриф буюриш режалаштирилган.
16−17 май кунлари губернатор Фил Брайант ва делегациянинг бошқа аъзолари Навоийда биринчи Ўзбекистон-Америка-Канада бизнес форумида иштирок этади. Тадбирда АҚШ ва Канададан 100 га яқин компания вакилларининг иштирок этиши кутилмоқда.
Бизнес форум доирасида қатор муҳим ҳужжатлар, жумладан Зарафшон ва Клинтон шаҳарлари ўртасида биродарлик алоқаларини ўрнатиш тўғрисидаги келишувнинг имзоланиши кутилмоқда.
