25 апрель куни Ўзбекистон ташқи ишлар вазирининг ўринбосари Алишер Абдуалиев Туркиянинг Yildirim Holding компанияси бизнесни ривожлантириш бўйича ижрочи директори Метин Октай билан учрашди. Учрашувда давлат-хусусий шериклик тамойиллари асосида биринчи электр стансиясини қуриш бўйича инвестиция лойиҳасини амалга ошириш масалалари муҳокама қилинди, дея хабар қилди ТИВ матбуот хизмати.
Ўзбекистоннинг Туркиядаги элчихонаси кўмагида ишлаб чиқилган 1,2 миллиард долларлик лойиҳа тўғридан-тўғри хорижий инвестициялар орқали Сурхондарё вилоятида амалга оширилади. Иссиқлик электр станциясининг қуввати табиий газда 900 МВтни ташкил этади.
Метин Октайнинг қайд этишича, компания ушбу лойиҳанинг муҳимлигини англайди ва халқаро атроф-муҳит стандартларига жавоб берадиган замонавий станция қуриш учун энг илғор технологияларни ва ноу-ҳауни жалб этишни режалаштирмоқда.
Шунингдек, учрашув давомида кимё саноати, транспорт инфратузилмаси, тоғ-кон саноати ва бошқа соҳаларда истиқболли лойиҳалар юзасидан фикр алмашилди.
Yildirim Holding компанияси Туркияда энергетика, транспорт инфратузилмаси ва логистика, кимё ва тоғ-кон саноати каби соҳаларга ихтисослашган етакчи компаниялардан бири ҳисобланади. У Туркия, хорижий давлатлар, шу жумладан, АҚШ, Испания, Россия ва бошқа мамлакатлардаги 50 дан ортиқ компаниялар билан ҳамкорликда инвестицион лойиҳаларга эга.
