Қатар пойтахти Доҳа шаҳрида ўтказилаётган енгил атлетика бўйича Осиё чемпионатининг 23 апрель куни ўтказилган баҳсларда ҳам 3 нафар ўзбекистонлик спортчи совринли ўринларни қўлга киритди. Бу ҳақда Жисмоний тарбия ва спорт вазирлиги матбуот хизмати хабар берди.

Етти кураш йўналиши бўйича баҳсларда иштирок этган Екатерина Воронина 6198 балл жамғариб, олтин медални қўлга киритди. Иккинчи ўринга Екатеринадан 205 балл кам тўплаган ҳиндистонлик С.Барман сазовор бўлган бўлса, учинчи ўрин 5829 очко жамғарган хитойлик Вангга насиб этди.

Баландликка сакраш баҳсларида Светлана Радзивил ва Надия Дусанова медаль учун баҳсга киришди. Бу сафар омад Надияга кулиб боқди. У 1,90 метрлик баландликни забт этиб, олтин медални қўлга киритди. Светлана эса 1,88 метр натижа билан бронзага сазовор бўлди. Иккинчи ўрин Радзивил билан бир хил натижа кўрсатган, бироқ уринишлардан унумли фойдаланиш бўйича устунликка эширган қозоғистонлик Надежда Дубровская насиб этди.

Ушбу учлик Индонезияда ўтказилган Осиё ўйинларида ҳам ўзаро беллашишган бўлиб, Светлана Радзивил биринчи (1,96), Надия Дусанова (1,94) иккинчи ва Надежда Дубровская (1,84) учинчи ўринни қўлга киритган эди.

Эслатиб ўтамиз, яна бир ўзбекистонлик атлет Руслан Қурбонов ушбу мусобақанинг уч хатлаб сакраш бўйича баҳсларида олтин медалга сазовор бўлган эди.