Шри-Ланкадаги католик черковлари ва меҳмонхоналарда содир этилган саккизта портлаш қурбонлари сони 290 кишига етди, яна 500 киши жароҳатланди, дея хабар қилди РИА Новости. Аввалроқ 207 кишининг қурбон бўлгани ва 450 кишининг жароҳат олгани айтилган эди.
Вафот этганлар орасида Дания, Япония, Покистон, Марокаш, Ҳиндистон, Бангладеш, Хитой, Нидерландия, АҚШ, Туркия ва Буюк Британия фуқаролари бор.
Мудофаа вазири Руван Вижевардена террористик актларни диний экстремистлар содир этганини қайд этди, дея ёзмоқда Интерфакс. У аксарият портлашлар худкуш террорчилар томонидан амалга оширилганини маълум қилди.
Портлашларда алоқадорликда гумонланиб 24 киши қўлга олинган. Полиция ҳужумларда фойдаланган бўлиши мумкин бўлган ю машинасини аниқлади. Терактларни мамлакат президенти Майтрипала Сирисен топшириғи билан тузилган махсус комиссия тергов қилмоқда.
Шри-Ланкада якшанба куни Пасха байрами нишонланаётган вақтда қатор портлашлар содир этилди. Биринчи олтита портлаш Коломбо, Негомбо ва Баттикалоадаги учта черков ва учта меҳмонхонада, еттинчиси — орол-давлат ғарбида, саккизинчиси — Коломбодаги турар жой мажмуаси яқинида амалга оширилди.
Ўзбекистон президенти Шавкат Мирзиёев Шри-Ланка президенти Майтрипала Сирисенага ҳамдардлик йўллади, дея хабар қилди давлат раҳбари матбуот хизмати.
