Франциянинг Бухоро билан биродарлашган Рюэй-Мальмезон шаҳрида дўстлик алоқалари ўрнатилганининг 20 йиллиги муносабати билан «Ўзбек боғи» очилиб, унга буюк қомусчи олим Ибн Сино ёдгорлиги ўрнатилди. Бу ҳақда Ўзбекистоннинг Франциядаги элчихонаси «Газета.uz"га маълум қилди.
Хориждаги илк шу каби «Ўзбек боғи"га Бухородан келтирилган ўрик, гилос, олма, узум, анжир ва бошқа дарахт кўчатлари ўтқазилди. Маросимда иштирок этиш учун Францияга Бухоро ҳокими Ўктам Барноев бошчилигидаги делегация ташриф буюрди.
Париж агломерацияси ва Рюэй-Мальмезон мэри Патрик Олье очилиш маросимида Бухоро билан алоқалар ушбу шаҳар биродарлик алоқаларини ўрнатган бошқа давлатлардаги қолган 15 шаҳарга нисбатан фаолроқ эканини таъкидлаб ўтди.
Мисол сифатида Рюэй-Мальмезон мэриясида биродарлик алоқалари ўрнатилганининг 20 йиллиги муносабати билан маданий дастур ташкил этилгани, унда ўзбек мусиқачилари ва ижрочилари чиқишлари, ўзбек ипагидан тайёрланган либослар намойиши ва француз рассоми Даниел Хурбаннинг Абу Али Ибн Синога бағишланган «Бухоро — атоқли шахслар замини» кўргазмаси бўлиб ўтганини келтириб ўтди.
Қайд этиш жоизки, Бухоро ва Рюэй-Мальмезондан ташқари, Самарқанд ва Лион, Хива ва Версал ўртасида ҳам биродарлик алоқалари ўрнатилган.
