«Ўзбекистон ҳаво йўллари» Миллий авиакомпанияси флоти тўртинчи Boeing 787−8 Dreamliner самолёти билан тўлдирилди, дея хабар қилди МАК матбуот хизмати. Шанба куни кечқурун «Орзу лайнери» Эвереттедаги (Вашингтон штати, АҚШ) Boeing заводидан тўхтовсиз парвозни амалга оширган ҳолда Тошкент аэропортига қўнди.
Янги самолётга аввалги учта Boeing 787−8 Dreamliner каби ёнилғи сарфлаш самарадорлигини ошириш, шовқин даражасини пасайтириш ва атмосферага CО2 газининг ажраб чиқишини камайтириш имконини берувчи GE Аviation компаниясининг GEnх-1B двигателлари ўрнатилган.
Авиалайнер бизнесда — 24та, эконом классда — 222та ва жами 246та йўловчини ташишга мўлжалланган. Самолёт саҳни қулай ва кенг ўриндиқлар, янги пол қопламлари, ёритиш ва товуш изоляцияси, индивидуал кўнгилочар дастурли HD сенсор мониторлар билан таъминланган. Иллюминаторлар баландлиги 46 см ни ташкил этиб (барча тижорий лайнерлар орасида рекорд), улар бошқарилувчи электрохром қоронғилаштириш технологияси билан таъминланган.
Яна бир фарқлардан бири лайнерга интернетга кириш ускуналари ўрнатилган. Бу Uzbekistan Airways компаниясининг иккита А320neo самолётидан кейинги учинчи «Бортда интернет» хизматидан фойдаланиш мумкин бўлган ҳаво кемасидир. Panasonic Avionics Corporation алоқа провайдери ва кўнгилочар тизимлар етказиб берувчиси ҳисобланади.
Boeing 787−8 Dreamlinerнинг Марказий Осиёдаги биринчи буюртмачиси бўлган Ўзбекистон миллий авиакомпанияси уларнинг тижорий эксплуатациясини 2016 йилда бошлаган. МАКнинг 2020 йилга мўлжалланган ривожланиш режаларига мувофиқ, авиапарк ушбу русумдаги олтита самолёт билан тўлдирилади ва МДҲда бундай самолётларнинг етакчи эксплуатантига айланади, дейилади хабарда.
Boeing 787−8 фюзеляжи элементларининг 50 фоизи углерод асосидаги композит материаллардан тайёрланган бўлиб, улар алюмин фюзеляжли лайнерлардан енгиллиги ва мустаҳкамлиги билан ажралиб туради.
