9 апрель куни кечқурун «Ўзбекистон ҳаво йўллари» Миллий авиакомпанияси сотиб олган иккинчи Airbus A320neо самолёти Гамбургдан Тошкентга етиб келди. Ушбу моделдаги биринчи самолёт 11 март куни етиб келган ва МАК ундан халқаро йўналишларда фойдаланишни бошлаб юборган.
Uzbekistan Airways матбуот хизматининг хабар қилишича, самолёт биринчи А320nео cингари ўзининг ёқилғи тежамкорлигини таъминловчи CFM International компаниясининг LEAP-1А двигателлари ва аэродинамик хусусиятларини янада яхшилаш имконини берувчи қанот конструкциясидаги замонавий ишланмалари, шу билан бирга симсиз интернет тармоғига уланиш ускуналари билан жиҳозланганлиги туфайли аввалги ҳаво лайнерлардан фарқланади.
Шунингдек, у икки классли компоновкада ишланган бўлиб, 150 йўловчини (бизнесда — 12та, эконом классда — 138та) ташишга мўлжалланган. Самолёт салонининг замонавий дизайни парвоз давомида йўловчиларга максимал қулайлик яратади. Қулай ва кенг ўриндиқлар, ҳар бир йўловчи учун мўлжалланган индивидуал кўнгилочар дастурли мониторлар, самолёт саҳнида ҳавонинг софлигини сақлаш ва тўғри тақсимланишини таъминловчи мукаммаллаштирилган кондиционер тизимига эга.
Авиакомпания тўртта Интернет-уланиш пакетини тақдим этади: LITE (20 Мб) — тезкор мессенджерларни ишлатиш учун, MEDIUM (50 Мб) — ижтимоий тармоқларда мулоқот қилиш ёки янгиликлар сайтларига кириш учун, STREAM (120 Мб) — онлине иш ёки интернетга чиқиш учун қулай интернет учун, BUSINESS (220 Мб) — мазкур хизматнинг имкониятларини максимал даражада ошириш учун. Интернет тариф режасининг энг кам нархи — 5.95$, энг юқори нархи — 52,95$.
Парвоздаги алоқа провайдери МАКнинг янги Аirbus А320nео ва ҳозирда фойдаланилаётган Boeing 787−8 Dreamliner самолётлари бортида Inflight Entertainmentand Connectivity (IFEC)нинг кўнгилочар дастурлари ва алоқа тизимини ўрнатган Panasonic Avionics Corporation компанияси ҳисобланади.
2020 йилнинг кузида учинчи A320neo лайнерининг, яқин кунларда эса тўртинчи Boeing 787−8 Dreamliner ҳаво кемасининг етказиб берилиши кутилмоқда. Ушбу самолётларда ҳам интернетга симсиз уланиш имконияти мавжуд бўлади.
