Корея Республикаси президенти Мун Чжэ Ин Марказий Осиёнинг учта мамлакати бўйлаб сафари доирасида 18−21 апрель кунлари Ўзбекистонга ташриф буюради.
Корея Республикаси президенти матбуот хизматининг хабар қилишича, 16−18 апрель кунлари у Туркманистонга ташриф буюриб, президент Гурбангули Бердимуҳамедов ва бошқа расмий шахслар билан ҳамкорликни кенгайтириш борасида музокаралар олиб боради.
Ўзбекистонда Мун Чжэ Ин президент Шавкат Мирзиёев билан икки мамлакат ўртасидаги стратегик ҳамкорликни мустаҳкамлаш ва икки томонлама ҳамкорлик истиқболлари масалаларини муҳокама қилади.
Эслатиб ўтамиз, Шавкат Мирзиёев 2017 йил 22−25 ноябрь кунлари Жанубий Кореяга давлат ташрифи билан борган эди.
21−23 апрель кунлари Жанубий Корея президенти Қозоғистонга ташриф буюради. Янги президент Қосим-Жомарт Токаев билан учрашув ўтказиши режалаштирилган.
Ташрифдан кўзланган мақсад — Жанубий Кореянинг Марказий Осиё давлатлари билан яқин муносабатларини мустаҳкамлаш ва Мун Чжэ Иннинг «Янги шимолий сиёсат"и доирасида консенсусга эришишдан иборат.
