Тошкентнинг Юнусобот туман ички ишлар органлари фаолиятини мувофиқлаштириш бошқармаси ҳузуридаги тергов бўлими 1 апрель куни тиланчилик учун қўлга олинган 59 ёшли Мухтабар Ю. га нисбатан жиноят иши қўзғатишдан воз кечиш тўғрисида қарор қабул қилди. Тошкент ИИББ матбуот хизматининг хабар қилишича, бундай қарор раҳмдиллик ва инсонийлик, қолаверса аёлнинг ёшидан келиб чиқиб қабул қилинди.
28 январь куни маъмурий ишлар бўйича Юнусобод туман суди Мухтабар Ю.ни Маъмурий жавобгарли тўғрисидаги кодекснинг 188−3- моддаси 1-қисмида («Тиланчилик қилиш») кўзда тутилган ҳуқуқбузарликни содир этганликда айбдор деб топиб, уни энг кам иш ҳақининг 0,5 баравари миқдорида жаримага тортган эди.
1 апрель куни аёлнинг Бодомзор кўчасида жойлашган масжид яқинида яна тиланчилик билан шуғулланаётгани қайд этилган. Жарима қўлланилганидан сўнг яна тиланчилик билан шуғулланиш Жиноят кодексининг 127−1-моддасига мувофиқ, 240 соатгача мажбурий жамоат ишлари ёки икки йилгача ахлоқ тузатиш ишлари ёхуд бир йилгача озодликни чеклаш ёки бир йилгача озодликдан маҳрум қилиш билан жазоланади.
ИИББнинг қайд этишича, аёлнинг эри ва тўрт нафар вояга етмаган фарзанди бор, унинг барча қариндошлари меҳнатга лаёқатли ва унинг таъминотидан воз кечишмаган. «Тиланчилик билан шуғулланиш унинг хоббисига айланган».
«Аёл ва унинг қариндошлари билан жиддий профилактик суҳбат ўтказилди», — дейилади ИИББ хабарида.
