Адвокат ва фаол фуқаро Зузана Чапутова Словакияда ўтказилган президентлик сайловида ғолиб бўлди. Шундай қилиб, мамлакатни илк бор аёл киши бошқарадиган бўлди, дея хабар беради РИА Новости.

Словакия статистика бошқармаси берган маълумотга кўра, 45 ёшли Чапутова 58,4% овоз олди. Унинг рақиби — Еврокомиссия раиси ўринбосари Марош Шефчович 41,6% овоз тўплади. Рўйхатга олинган сайловчиларнинг 41,79 фоизи сайловда иштирок этди.

Словакия 1993 йилда мустақилликни қўлга киритганидан бери Чапутова мамлакатнинг бешинчи президенти бўлди. У 15 июнь куни — амалдаги президент Андрей Кискининг ваколати тугаганидан сўнг вазифасига киришади.

Зузана Чапутова 1996 йилда Братиславадаги Коменский номидаги университетида магистрлик даражасини олган. 2001 — 2017 VIA IURIS жамоатчилик бирлашмаси билан ҳамкорлик қилган, 2010 йилдан адвокат сифатида ёрдам бера бошлаган. Давлат муассасаларида меҳнат ҳуқуқини таъминлаш масалалари билан шуғулланган.