Футбол бўйича Ўзбекистон терма жамоаси ярим ҳимоячиси Отабек Шукуров Хитойнинг «Гуанчжоу Эвергранд» клубидан унга жароҳат етказган ҳужумчи Вэй Шихаога тайинланган жазони юмшатишни сўради. Бу ҳақда футболчи ўзининг Twitter`даги саҳифасида маълум қилди.
China Cup халқаро мусобақасининг учинчи ўрини учун Ўзбекистон ва Хитой ўртасида бўлиб ўтган ўйинда Вэй Шихао Отабек Шукуровга оғир тан жароҳати етказди. Кейинги текширувлар унинг тўпиғи синганини кўрсатди. Кейинги куни хитойлик ҳужумчи ўзбекистонлик спортчини кўришга борди ва унга ўриндиқ-аравача ҳамда мевали сават совға қилди.
Ҳодисадан сўнг Вэй Шихао тўп сураётган «Гуанчжоу Эвергранд» клуби уни бир ой муддатга ўйинлардан четлатди. Ўйинчи билан тузилган шартнома ҳам бекор қилиниши мумкин.
Отабек Шукуров жароҳат туфайли тушкунликка тушиб қолган, бироқ унга дўстлари ва мухлисларининг кўмаги ёрдам бераётганини айтиб ўтди.
«Сўнгги икки кун ўзимни жуда тушкун ҳис этдим, чунки мен мавсум охирига қадар жамоамдаги (БААнинг „Шаржа“ клуби ўйинчиси — таҳр.) дўстларимга ёрдам бера олмайман», — деди у.
Унинг сўзларига кўра, хитойлик футболчининг дисквалификация ҳақида эшитганида хафа бўлган.
«Вэй Шихао жазоланганини ва у ҳам кейинги ўйинларда ўз жамоасига ёрдам бера олмаслигини ўқиб, яна хафа бўлдим. Ёш футболчи сифатида футбол ўйнамасликнинг қандай фожиа эканини жуда яхши тушунаман. Вэй Шихао келиб, кечирим сўраганда унинг узрини қабул қилдим», — деди Ўзбекистон темаси ярим ҳимоячиси.
Ўйинчи «Гуанчжоу Эвергранд» клубидан расман Вэй Шихаога қўлланилган чорани енгиллатишни сўради.
