1 июлдан Ўзбекистонда жисмоний шахсларга тўрттагача ўриндиқли енги автомобилларда йўловчи ташиш хизматларини кўрсатишга рухсат бериш таклиф этилмоқда. Бу ҳақдаги президент қарори лойиҳаси муҳокама учун эълон қилинди.

Лойиҳада қайд этилишича, бунинг учун якка тартибдаги тадбиркор сифатида рўйхатдан ўтиб, электрон платформа орқали оператор билан шартнома тузиш талаб қилинади. Аввалроқ президент қарори билан йўналишли такси машиналари учун 1 июлдан кузовни тўлиқ бўяш ўрнига ёпиштирилувчи материаллардан фойдаланишга ижозат берилган эди. Янги ҳужжатда эса автомобилни тўлиқ бўямасдан, фақатгина ён томонлари, олд капоти ва юкхона устига сариқ фондаги шахмат композицияли белгиларни ёпиштириш таклиф қилинмоқда. бундай машиналар учун махсус рақам белгилари талаб қилинмайди.

Йўловчи ташиш билан шуғулланувчи ЯТТларга лицензия берганлик учун давлат божи миқдорини энг кам иш ҳақининг 3 баравари этиб белгилаш таклиф қилинмоқда.

Шунингдек, йўналишли такси хизматларини кўрсатувчи ЯТТлар учун қуйидаги мажбуриятларни белгилаш таклиф этилмоқда:

  • ички ва ташқи безаклар ва экипировкаларга бўлган талабларга риоя этиш, йўналишни таксиларнинг ягона фарқловчи белгилари билан таъминлаш (махсус рақам белгиларидан ташқари);
  • буюртмаларни ҳисобга олиш функцияси бўлган махсус илова, тўлов терминаллари, таксометр, радиоалоқа воситасидан фойдаланиш ва йўловчиларга йўл ҳақи тўғрисида мажбурий маълумот бериш;
  • йўналишга чиқишдан аввал махсус рейсдан олдинги кўрик шохобчаларида тиббий кўрикдан ўтиш ва автомобилни техник кўрикдан ўтказиш (тартиблар Транспорт вазирлиги томонидан ўрнатилган).

Йўналишли такси сифатида фойдаланиш учун мўлжалланган енгил автомобилларнинг ижара шартномасини нотариал тасдиқлатиш тўғрисидаги талабни бекор қилиш таклиф этилмоқда.

Ҳужжатда операторлар — такси мижозларини топиш бўйича интерактив хизматларни кўрсатувчи юридик шахслар учун мажбуриятлар ҳам санаб ўтилган.