«Яндекс Метро» мобил иловасидан Тошкент метрополитени ҳам ўрин олди. Унинг ёрдамида пойтахтликлар ва меҳмонлар зарур йўналишни кўриш, қаерда бекат алмаштириш ва зарур бекатга бориш учун қанча вақт сарфланишини билиши мумкин. Бу ҳақда «Яндекс» матбуот хизмати «Газета.uz"га хабар қилди.

Фойдаланувчилар жўнаш ва бориш станцияларини кўрсатишлари лозим. Мобил илова йўналиш ҳамда йўналишни алмаштириш ёки шаҳарга чиқиш учун қайси вагонга чиқиш энг мақбул эканини кўрсатиб туради. Бундан ташқари, махсус белгилар орқали темир йўл ва автовокзаллар кўрсатилган.


«Яндекс Метро» Пушкин станциясидан Чорсу бекатигача йўлни кўрсатмоқда. Катталаштириш учун расм устига босинг

Иловада станцияларнинг иш вақти ва уларнинг шаҳардаги жойлашган ўрнини билиш мумкин. Шунингдек, станция таъмир учун ёпилса ҳам бу ҳақда иловада маълум қилинади.

Ўзбек ва рус тилидаги илова интернетсиз ишлайди ва уни Android, iOS учун юклаб олиш мумкин. Компаниядан қайд этилишича, келгусида иловадан Тошкентнинг диққатга сазовор жойлар ва фойдали манзиллар ҳам ўрин олади.

Хизмат хорижда ҳам ишлайди: Москва, Санкт-Петербург, Екатеринбург, шунингдек Россия, Беларусь, Украина ва Туркиядаги яна 10 та шаҳар метро хариталари ҳам мавжуд.