19 март — Наврўз арафасида — Тошкентда илк бор Халқаро картошка куни нишонланади, дея хабар қилди тадбир ташкилотчилари «Газета.uz"га.
Худди шу куни Картошка ишлаб чиқарувчилар ассоциацияси йирик фермер хўжаликлари, қишлоқ хўжалиги техникаларини ишлаб чиқарувчилар ва ўғит етказиб берувчилар, илмий-тадқиқот институтлари вакиллари, ритейл тармоқлар эгалари, шунингдек МДҲ ва европалик меҳмонлар иштирокида кўргазма ва кооперацион биржа бўлиб ўтади.
Махсуслаштирилган асбоб-ускуналар кўргазмасида экспертлар картошка ишлаб чиқариш соҳасидаги технологик янгиликлар ва ишга замонавий ёндашиш жараёнлари билан яқиндан танишиш имконига эга бўлади. Шунингдек, уруғчилик компаниялари, махсуслаштирилган қишлоқ хўжалиги техникаси — холодиль (музлатувчи, совутувчи) ва ирригацион ускуналар ишлаб чиқарувчилари ҳамда ўсимликларни муҳофаза қилувчи препаратлар ва бошқа бир қатор компаниялар ҳам тадбирда ўз маҳсулотларини намойиш этади.
Анжуман давомида мамлакат қишлоқ хўжалиги соҳасида эришилган ютуқлар намойиши, очиқ мулоқотлар ҳамда семинар спикерларининг чиқишлари ҳам режалаштирилган. Тадбирга ташриф буюрувчилар картошка ишлаб чиқариш ва унга қайта ишлов беришда уруғчиликдан тайёр маҳсулотга айлантиришгача бўлган жараён билан танишади.
Ўзбекистонда картошкадан ярим тайёр маҳсулотларни ишлаб чиқариш бўйича биринчи корхонанинг очилиши дастурга якун ясайди.
