Ўзбекистон президенти Шавкат Мирзиёев 10 март куни Аддис-Абеба аэропортидан учиб чиқишда самолётнинг қулаши оқибатида экипаж аъзолари ва йўловчилар, жумладан, БМТ тизимининг 19 нафар ходими ҳалок бўлгани муносабати билан Эфиопия президенти Сахле-Ворк Зевде ва БМТ Бош котиби Антониу Гутерришга самимий ҳамдардлик билдирди. Бу ҳақда давлат раҳбари матбуот хизмати хабар берди.

Якшанба куни эрталаб Ethiopian Airlines авиакомпаниясининг бортида 157 киши, жумладан 8 нафар экипаж аъзоси бўлган Boeing 737−8 самолёти Эфиопиянинг Дэбрэ-Зэйт яқинида ҳалокатга учради. Ҳалок бўлганлар орасида 35 мамлакат вакиллари бор.

БМТ Янгиликлар маркази хабарида келтирилишича, лайнер бортида БМТ тизимлари, жумладан Халқаро миграция ташкилоти, Жаҳон озиқ-овқат дастури, БМТнинг қочқинлар ишлари бошқармаси, БМТнинг атроф-муҳит бўйича дастури ва Жаҳон банкида фаолият кўрсатаётган 19 киши бор эди.

Душанба куни ХХР Фуқаро авиацияси бошқармаси якшанба куни Boeing 737−8 самолёти Эфиопияда ҳалокатга учраганидан сўнг ички рейсларда шу каби лайнерлар парвозини тўхтатди.

РИА Новостининг маълум қилишича, Хитой авиацион ҳукумати бу ўтган йилнинг 29 октябрда Индонезиянинг LionAir авиакомпаниясига қарашли Boeing 737−8 ҳалокатга учрагандан кейинги иккинчи фалокат эканини қайд этган.

«Ҳар икки самолётнинг деярли янги Boeing 737−8 эканини ҳамда ҳар икки ҳалокат ҳам учиш босқичида содир бўлганини ҳисобга олсак, икки фалокат ўртасида ўхшашликлар борлигини кўрсатмоқда», — дейилади баёнотда.