«Ўзбекистон ҳаво йўллари» Миллий авиакомпанияси авиапарки биринчи Airbus A320neo самолётига эга бўлди. Самолёт душанба куни кечга яқин Гамбургдан етиб келди, дея хабар қилди «Газета.uz» мухбири.
Ўз сигментида янги ҳисобланган A320neo (neo — new engine option) 150 ўриндиқлик бўлиб, унинг 12 таси бизнес-клас, 138 таси эса эконом синфга оид. У янги LEAP-1A двигателлари ва фюзеляж (самолёт корпуси — таҳр.) конструкциясининг замонавий талаблар асосида такомиллаштирилгани ҳисобидан аввалги турдошларига нисбатан 20 фоизга тежамкор. Лайнернинг парвоз масофаси 4500 дан 5000 километрдан зиёдроққа узайтирилган. Бу эса бутун Марказий Европа ҳудудларига рейсларни амалга оширишга имкон беради.
«Ўзбекистон ҳаво йўллари» бош директори ўринбосари Геннадий Харлап айни вақтда янги самолёт учун йўналишлар ишлаб чиқилаётганини қайд этди. Унинг Европага парвозларни амалга ошириши кутилмоқда.
«Компаниямиз тарихида илк бор [самолёт] интернет, Wi-fi билан жиҳозланган. Бу самолёт ўрта масофалар учун… Самолёт Ўзбекистон аҳолиси, сайёҳлар учун максимал қулайлик беради», — деди у.
Унинг сўзларига кўра, Uzbekistan Airways иккинчи A320neo самолётини апрелнинг бошида олиб келинишини кутмоқда. 2020 йилнинг октябрь-ноябрида учинчи шундай самолёт келтирилади.
Жорий йилнинг апрель-июнида иккита Boeing 787 Dreamliner самолётларининг олиб келиниши, улар ҳам Wi-Fi ускуналари билан жиҳозланиши кутилмоқда.
«Шундай қилиб, биз флотимизни барча халқаро стандартлар бўйича энг юқори даражага олиб чиқишни бошлаймиз. Хизмат кўрсатиш маданияти, йўловчиларнинг ҳордиқ чиқариши ва йўловчи ўзини уйидагидек ҳис қилиши учун зарур талаб қилинувчи барча нарса», — деди Геннадий Харлап.
Иккита A320neo самолётини етказиб бериш бўйича шартнома 2017 йилда имзоланган эди. Бугунги кунда «Ўзбекистон ҳаво йўллари» Boeing 757/767, Boeing 787−8, А320 ҳамда юк ташувчи Boeing 767−300BCF самолётларидан таркиб топган.
Фото
