27 февраль куни Беларус Республикасининг пойтахти Минск шаҳрида МДҲга аъзо давлатларнинг Мудофаа вазирлари кенгаши қошидаги Спорт қўмитанинг навбатдаги йиғилиши бўлиб ўтди. Унда Ўзбекистон томонидан Қуролли Кучлар Бош штаби жисмоний тайёргарлик ва спорт бўлими бошлиғи подполковник Азиз Ҳайдаров ҳамда Мудофаа вазирлиги Спорт клуби бошлиғи подполковник Мансур Мамадаминов иштирок этди. Бу ҳақда Мудофаа вазирлиги матбуот хизмати хабар берди.

Мазкур йиғилишда МДҲга аъзо давлатлар Раҳбарлари кенгаши томонидан 2018 йил 28 сентябрда имзоланган «1941−1945-йилларда Улуғ Ватан урушидаги Ғалабанинг 75 йиллигини нишонлашга тайёргарлик кўриш тўғрисида"ги қарорида белгиланган масалалар ижросига қаратилди. Жорий йилнинг июнь-июль ойларида Қозоғистон Республикасида МДҲга аъзо мамлакатларнинг олий ҳарбий таълим муассасалари курсантлари ўртасида биринчи маротаба Ҳарбий-спорт ўйинларининг ўтказилиши муҳокама қилинди.

Йиғилиш давомида 2020йилда МДҲга аъзо давлатлар дўстона армиялари ўртасида ИИИ Ҳарбий-спорт ўйинларини ташкил этиш кўриб чиқилди. 25 май — 3 июнь кунлари ўтказилиши режалаштирилаётган ўйинлар 6 та йўналиш бўйича ўтказилади. Шунингдек, Қўмита ишида 2019 йилда Қирғизистон ҳудудидаги Ленин чўққиси ҳамда 2020 йилда Тожикистоннинг Коммунизм чўққисига гуруҳ таркибида ҳарбий-спортчиларнинг чиқиши бўйича мусобақаларни биринчи марта ўтказишга келишиб олинди.

Халқаро армия ўйинларидан кейинги ўринда келаётган ва МДҲга аъзо давлатларида тобора оммалашиб бораётган Ҳамдўстликка аъзо давлатлар Дўстона армияларининг спартакиадаси бу йил ҳам муросасиз бўлиши кўзда тутилган.

Хусусан, ўтган йилда Тошкентда ўтказилган «Армия қўл жанги» бўйича халқаро мусобақаларда ҳарбийларимиз умумжамоа ҳисобида ғалаба қозонган эди. Бу йилда мазкур мусобақаларга Қозоғистон мезбонлик қилади.

Спартакиада доирасида ўтказиладиган командирлик стартлари ва ҳарбий кўпкураш мусобақалари шу йилнинг июль ойида Беларусда бўлиб ўтади.

Янгилик сифатида спартакиаданинг «ПМ-3 ва АК-3 машқларида штатдаги ёки штатга илова қилинган жадвалдаги қуроллардан отиш» мусобақаларига Ўзбекистон мезбонлик қилади. Шунингдек, Спартакиаданинг «Тоғ учкураши» баҳслари сентябр ойида Россия ҳудудида бўлиб ўтади.

Мазкур мусобақаларнинг барчасида Ўзбекистон Мудофаа вазирлиги вакиллари иштирок этиши кўзда тутилган.

Йиғилиш давомида Ҳамдўстликка аъзо давлатларнинг қуролли кучлари ўртасида жисмоний тайёргарлик ва спорт соҳасида ҳамкорликнинг «Истиқболли режа» лойиҳасини тайёрлашга ҳам келишиб олинди. 2019-йилнинг якунлари бўйича навбатдаги йиғилиш Қозоғистонда ўтказилади.