Тошкентда ногиронлиги бўлган йўловчи учун пандус туширишдан бош тортган автобуслар ҳайдовчиларига чора кўрилди, дея хабар қилди «Тошшаҳартрансхизмат» компанияси.

20 февраль куни пойтахтнинг Шимолий вокзал бекатида ногиронлиги бўлган шахс 62- («12-автобус саройи"га қарашли) ва 13т- («1-автобус саройи») йўналишларида қатновчи ўрта сиғимли «SAZ LE 60» русумли автобусга чиқмоқчи бўлган. Ҳайдовчилар эса пандус очилмаётганини баҳона қилиб, йўловчини олмаган.

Вазият «Тошшаҳартрансхизмат» раҳбарияти томонидан ўрганиб чиқилди. Ҳайдовчилар 10 кунлик хўжалик ишларига ўтказилди.

Келгусида бундай ҳолатга йўл қўймаслик мақсадида ҳайдовчилардан кафолат хатлари олинди. Уларга пандусни ишлатиш бўйича амалий семинарлар ташкил этилди.

Эслатиб ўтамиз, президентнинг ўтган йил мартдаги фармони билан Ўзбекистонда ногиронлиги бўлган шахслар учун мўлжалланмаган шаҳар йўловчи транспорт воситаларини сотиб олиш тақиқланган. Маъмурий жавобгарлик тўғрисидаги кодексда эса жамоат транспортидан фойдаланиш учун ногиронлиги бўлган шахсларга шароитлар яратиш бўйича талабларни бажармаганлик учун чора кўзда тутилган.