Сўнгги вақтда оилавий ажримларнинг кўпайиши алимент ундириш билан боғлиқ мурожаатлар сонини ҳам оширган. Бу ҳақда Қашқадарё вилоят маъмурий суди судьяси Ойбек Бекназаров маълум қилди.
Мисол учун, 1980 йилда Қарши шаҳрида туғилган Олимжон Баймуродов ҳам оиласи билан ажрашган. Унга нисбатан фуқаролик ишлари бўйича Чироқчи туман судининг 2014 йил 15 сентябрдаги суд буйруғига асосан Наргиза Шодиева фойдасига вояга етмаган бир нафар фарзанди моддий таъминоти учун то у 18 ёшга тўлгунга қадар ойлик иш ҳақининг тўртдан бир қисми миқдорида алимент ундириш белгиланган. Бироқ орадан ўтган 47 ой учун 17 миллион 520 минг сўм алимент пули ўз вақтида тўланмаган. Ўғли ҳам ўз кунини ўзи кўрадиган ёшда бўлса-ку қани, 2010 йилда туғилган ёш бола ҳали.
Қарши шаҳар маъмурий судида ўтган очиқ суд мажлисида Олимжон Баймуродов чиндан ҳам алимент пулини тўламай келгани, ҳозирда ҳам оилавий шароити оғирлиги сабабли бу пулни тўлай олмаслигини маълум қилди.
Суд Маъмурий жавобгарлик тўғрисидаги кодекс 474-моддасига асосан моддий ёрдамга муҳтож бўлган вояга етмаган ёки меҳнатга лаёқатсиз шахсни моддий таъминлашдан бўйин товлаш, яъни уларни моддий таъминлаш учун суднинг ҳал қилув қарорига ёки суд буйруғига биноан ундирилиши лозим бўлган маблағни жами бўлиб икки ойдан ортиқ муддат мобайнида тўламаслик ҳолатига кўра, ҳуқуқбузар О.Баймуродовга нисбатан маъмурий қамоқ жазоси тайинлашни лозим деб топди.
Маълумот ўрнида айтиш жоиз, 2018 йил давомида вилоят маъмурий судлари томонидан алимент билан боғлиқ, яъни вояга етмаган ёки меҳнатга лаёқатсиз шахсларни моддий таъминлашдан бўйин товлагани учун 213 та ҳолатда 235 нафар шахсга нисбатан иш кўрилган бўлиб, барча ҳуқуқбузарларга нисбатан маъмурий қамоқ жазоси тайинланган.
