АҚШнинг «Valmont Industries, Inc.» компанияси Ўзбекистон қишлоқ хўжалик майдонларида сув ресурслари сарфини «ақлли» технологиялар асосида назорат қилувчи инновацион суғориш тизимларини жорий этади, дея хабар қилди Инновацион ривожланиш вазирлиги матбуот хизмати «Газета.uz"га.
10−14 февраль кунлари Олий Мажлис Сенати раисининг биринчи ўринбосари Содиқ Сафоев бошчилигидаги Ўзбекистон делегацияси делегацияси сафида АҚШнинг Миссисипи штатига ташриф буюрган Инновацион ривожланиш ва Қишлоқ хўжалиги вазирлиги вакиллари «Valmont Industries, Inc.» компанияси раҳбарлари билан учрашди. Мулоқотларда инновацион суғориш тизимларини тўғридан-тўғри инвестициялар асосида тажрибада синалган илғор технологияларни қўллаган ҳолда жорий этиш бўйича келишувга эришилди. Биринчи босқичда фермерлик хўжалигининг 100 гектарли экин майдонида пилот лойиҳаси амалга оширилади.
Компания лойиҳани ишлаб чиқиш, ёмғирли суғориш тизимини далага ўрнатиш, шунингдек фермер хўжалиги ходимларини ўқитишга тайёрлигини билдирди. Қишлоқ хўжалиги вазирлиги тажриба лойиҳаси қайси фермер хўжалигида ўтказилишини белгилаб, 100 гектар экин майдон ажратилишини таъминлайди. Инновацион ривожланиш вазирлиги эса лойиҳанинг умумий ва илмий-техникавий бошқарувини амалга оширади.
Инновация вазирлиги маълумотларига кўра, Valmont Industries муҳандислик қурилмалари ва ирригация тизимлари соҳасида етакчи корхоналардан бири бўлиб, ирригацион суғориш технологиялари ва ускуналарини ишлаб чиқиш ва етказиб беришга ихтисослашган. У ўз фаолиятини дунёнинг 23 давлатида амалга ошириб келмоқда, компаниянинг бозор капитализациясининг миқдори 3 млрд доллардан ошиқдир.
Шунингдек, Ўзбекистон инновацион ривожланиш вазири Иброҳим Абдураҳмонов Миссисипи штатидаги Innovate Mississippi Инновацион уюшмаси президенти Т.Жэфф билан учрашиб, инновациялар, илм-фан ва технологиялар соҳасидаги томонларнинг илмий-тадқиқот бирлашмалари ўртасидаги ҳамкорликни ривожлантириш масалаларини муҳокама қилди.
Innovate Mississippi Миссисипи штатининг иқтисодиётини инновацион ва техник ривожланишини таъминловчи нотижорат ташкилоти бўлиб, стартап компаниялар, ихтирочилар, тадбиркорларга ёрдам кўрсатади, ишлаб чиқариш, муқобил энергия соҳаларига инвестицияларни киритиш ва бизнесни ривожлантириш орқали штат иқтисодиётининг ўсишига ҳисса қўшади.
Инновацион ривожланиш вазирлиги қошидаги Илғор технологиялар марказида фаолият юритаётган илмий лойиҳалар учун C.A.T. Science Accelerator акселератори билан ҳамкорлик қилишга, Ўзбекистондаги стартап жамоаларини онлайн режимида менторлар билан ишлашларига, Innovate Mississippi томонидан акселерация курслари ва семинарлар ўтказилишига, инновацион лойиҳаларни молиялаштириш учун инвестицияларни жалб қилишга келишилди.
