АҚШнинг Миссисипи штати губернатори апрелнинг биринчи ярмида Ўзбекистонга ташриф буюради. У давлатлар ўртасида дипломатик алоқалар ўрнатилгандан кейин Ўзбекистонга ташриф буюрувчи илк Америка губернатори бўлади, дея хабар қилди Ташқи ишлар вазирлиги матбуот хизмати.
Олий Мажлис Сенати раисининг биринчи ўринбосари Содиқ Сафоев бошчилигидаги Ўзбекистон делегацияси 11 февраль куни Миссисипи штати пойтахти Жексон шаҳрига бориб, шу куннинг ўзида губернатор билан учрашди.
Фил Брайант Ўзбекистон ва Миссисипи штати ўртасида кўплаб ўхшашликлар мавжудлигини, жумладан ҳар иккисининг ҳам қишлоқ хўжалиги, тўқимачилик-пахта саноати ривожлангани, қулай географик жойлашуви ва меҳнатсевар халқлари борлигини таъкидлаб ўтди.
Учрашувда томонлар Америка делегацияси таркибига Ўзбекистон билан ҳамкорлик алоқаларини ўрнатишга қизиқиш билдирган Миссисипи штатининг қишлоқ хўжалиги, саноат, нефт-газ ва машинасозлик соҳаларидаги етакчи компаниялари вакиллари киришини шартлашди.
ТИВ матбуот хизмати маълумотларига кўра, Миссисипи қишлоқ хўжалиги соҳасида АҚШда етаки ўринларни эгаллайди, ушбу штатда 36 мингдан ортиқ фермер хўжаликлари фаолият кўрсатади. 2018 йил якунларига кўра, ҳудуднинг ялпи миллий маҳсулоти ҳажми 113 млрд долларни ташкил этди.
