Риода ўтказилган 2016 йилги ёзги олимпиада ўйинларида чемпионликни қўлга киритган Шаҳобиддин Зоиров фаолиятини профессионал боксда давом эттиради. Бу ҳақда olamsport.com сайти хабар берди.

Бухоролик боксчи Буюк Британиянинг машҳур «MTK Global» промоутерлик компанияси билан шартнома имзолади. У ҳатто янги жамоаси билан бирга Испанияда ўқув-машғулот йиғинини ҳам ўтказишга улгурди.

«Ҳа, Британия компанияси билан шартнома имзоладим. Айни пайтда Бухорадаман. Ҳафта охирларида Англияга жўнаб кетишим керак. Ҳозир визанинг чиқишини кутяпман. Барча деталларга, яъни биринчи жангим қачон ва кимга қарши ўтказаман, каби саволларга у ерга борганимдан сўнг ойдинлик киритамиз», — деди Зоиров.

Маълумот учун, супероғир вазн тоифасидаги собиқ жаҳон чемпиони британиялик Тайсон Фьюри, шунингдек, Мартин Мюррей, Билли Жо Сондерс сингари собиқ жаҳон чемпионлари ҳам «MTK Global» промоутерлик компанияси мижози ҳисобланади.

Эслатиб ўтамиз, Шаҳобиддин Зоиров Рио олимпиадасининг ҳал қилувчи финал жангида россиялик машҳур боксчи Миша Алоянни мағлубиятга учратиб, шоҳсупанинг энг юқори поғонасига кўтарилган эди.