«Ўзавтосаноат» компанияси бошқаруви раиси ўринбосари Азизбек Шукуров Франциянинг PSA Groupe корпорацияси Жиззах вилоятида қўшма автомобиль заводини қуриш бўйича лойиҳани рентабелли эмас деб топганини «ўринсиз ва тўлиқ профессионал эмас» дея баҳолади. У ўз мулоҳазаларини сешанба куни бўлиб ўтган брифингда ўртоқлашди.
Декабрда «Ўзавтосаноат» завод қурилиши тўхтагани ҳақидаги хабарлар пайдо бўлганидан сўнг лойиҳа концепцияси PSA Groupe билан биргаликда «бошланғич маълумотлардаги баъзи кўзда тутилмаган ўзгаришлар муносабати билан» қайта кўриб чиқилаётганини маълум қилган эди.
«Биз „Ўзавтосаноат“ ва Ўзбекистон манфаатларидан келиб чиқиб PSA Groupe билан музокараларни давом эттирамиз. Peugeot Citroёn киритилган пулни 30 йил ичида қайтара олмаслигимиз мумкинлигига ишонганига келсак, бу унчалик ҳам профессионаллик эмас. Чунки ўтган йили компания 56 млрд евро ишлаб топди. Бу айрим мамлакатлар ЯИМидан кўпроқ. Эслаб ўтиш лозимки, Peugeot Citroёn бу ерга кириш ва қўшма корхона очишдан олдин Ўзбекистон бозори бўйича барча ҳисоб-китоб ва таҳлилларни ўтказди, талабни, ТИА, рентабелликни ўрганди», — дея қайд этди Азизбек Шукуров.
«Ўзавтосаноат» раиси ўринбосари томонларнинг битим шартлари конфеденциал бўлишига келишиб олгани ва жамоатчиликка ошкор қилинмаслиги кераклигини, шу сабабли мазкур вазиятда иқтисодий жиҳатларни маълум қила олмаслигини таъкидлаб ўтди.
Азизбек Шукуров қўшимча равишда Кореянинг Hyundai компанияси Ўзбекистонда енгил автомобиллар ишлаб чиқаришни режалаштираётгани ҳақида «эшитмаганини» маълум қилди. Наманган вилоятининг Тўрақўрғон туманида тижорат автомобиль техникаларини ишлаб чиқарувчи Hyundai-Namangan KD заводи қурилиши бошланган.
