GM Uzbekistan компанияси Cobalt моделининг янги намунасини ишлаб чиқариш бўйича режалардан воз кечди, дея хабар қилди «Ўзавтосаноат» бошқаруви раисининг техник сиёсат ва локализация бўйича ўринбосари Азизбек Шукуров сешанба куни бўлиб ўтган брифингда маълум қилди.
Янги Cobalt автомобилини 2019 йилдан ишлаб чиқариш режалаштирилган эди. Бироқ Азиз Шукуровнинг сўзларига кўра, компания General Motors билан ҳамкорликнинг янги концепциясига ўтиши муносабати билан эндиликда автомобиллар сафи Америка корпорация билан баробар равишда янгиланади.
«Янги Cobalt унчалик ҳам янги эмас. GM Бразилияда бу лойиҳани 2016 йилда амалга оширган, жорий йил сўнгида Cobalt [ишлаб чиқаришдан] олинади. Эски моделлар ортидан қувишдан маъно йўқ деб ҳисобладик. Ўзбекистонда янги Cobalt ишлаб чиқариш бўйича режалар бекор қилинди», — дея тушунтирди у.
«Ўзавтосаноат» раҳбари ўринбосари сентябрда Captiva моделини ишлаб чиқариш тўхтатилганидан сўнг унинг ўрнига иккита янги автомобиль ишлаб чиқаришни йўлга қўйиш тўғрисидаги режалар ҳақида маълум қилди. GM Uzbekistan Malibu седанини ишлаб чиқаришни ҳам тўхтатишни режалаштирмоқда.
«Биз янги платформани ўзлаштирамиз. Жорий йилдан бошлаб SUV сегментида икки автомобилни йиғиш бўйича ишларни бошлаймиз. Captiva`ни [ишлаб чиқаришдан] олдик, учинчи чорак охиридан унинг ўрнига иккита янги автомобиль бўлади», — деди Азизбек Шукуров.
Унинг сўзларига кўра, «Ўзавтосаноат"нинг GM билан аввалги ҳамкорлик концепцияси долзарблигини йўқотди.
«Авваллари биз GMнинг амалдаги моделларини олиб келар ва уларни маҳаллийлаштирар эдик. Бизнинг моделлар ўртача 9−10 йил давомида ишлаб чиқарилган — бу жуда узоқ муддат. Ҳозирда моделлар ҳар 3−5 йилда алмашмоқда. Шунинг учун из GM`даги ҳамкорларимиз билан келишиб олдик: янги инвестицион лойиҳаларни амалга оширамиз, келгуси уч йилда Асакадаги заводда моделлар қаторини янгилаймиз», — деди Азизбек Шукуров.
General Motors ўзининг глобал платформалари доирасида иккинчи ярим йилликдан янги моделларини Хитойда ишлаб чиқаришни бошлайди. Ўзбекистон унга 2021 йилдан қўшилади. «Унинг асосида биз учта янги моделни ишлаб чиқарамиз», — деди у.
Қайд этиш жоизки, 2019 йилда Хитой Chevrolet Monza ва Chevrolet Onix седанлари, Chevrolet Tracker мини-кроссовери, Chevrolet Blazer йўлтанламасини ишлаб чиқаради.
«Ўзавтосаноат» вакили яқин ойларда GM Uzbekistan номининг ҳам ўзгаришини маълум қилди.
