Ольга Забелинская Бельгияда ўтказилган велотрек бўйича International Belgian Track Meeting мусобақасида иккита олтин медални қўлга киритди, дея хабар қилди Ўзбекистон Миллий олимпия қўмитаси.

Велопойгачи Забелинская 2 февраль куни 192 баллик натижа билан олтин медални қўлга киритди. Иккинчи ўринни Польша вакиласи Лотте Копецки (167 балл), учинчи ўринни эса бельгиялик Марта Яскульска (159 балл) банд қилди.

Ольга Забелинская Point Race пойгаларида очколар ҳисобига кўра ғалаба қозонди ва навбатдаги олтин медалига сазовор бўлди. Иккинчи ўриндан бельгиялик Жольен Дьор (34 очко) жой олган бўлса, кучли учликка франциялик Виктуар Берто (31 очко) якун ясади.

Ольга Забелинская билан бир қаторда Екатерина Кнебелева ва Мурод Холмуродов ҳам Ўзбекистон номидан иштирок этди.

Мусобақа 1−3 февраль кунлари Бельгиянинг Генте шаҳрида бўлиб ўтди. Совринли ўринлар учун 15 давлатдан 11 жамоа қатнашди. Турнирда 2020 йилги Токио Олимпия ўйинлари учун рейтинг очколари ўйналди.