Metrotelecom қайд қилинган алоқа оператори йил ўртасигача Тошкент метрополитенининг барча станциясида Wi-Fi тармоғини ишга туширишни режалаштирмоқда. Бу ҳақда 17 январда бўлиб ўтган матбуот анжуманида Independent telecom innovations компанияси вакили «Газета.uz» мухбирига маълум қилди.
Ҳозирда «Пахтакор» ва «Алишер Навоий» ва номи айтилмаган яна бир станцияда синов режимида тармоққа уланиш мумкин. Тиғиз вақтларда, компания маълумотларига кўра, тармоққа 500 нафаргача кишининг уланиши кузатилмоқда.
Ҳозирча метрополитен йўловчилари фақат Metrotelecom медиапорталига улана олаяпти. Бу ерда видеоклиплар, мусиқалар, китоблар ва таълимий материалларни кўриш, тинглаш ва юклаб олиш мумкин.
Компания вакилининг қайд этишича, келажакда метро йўловчилари tas-ix ва интернетга улана олади. Ҳозирда ҳуқуқий ва технологик масалаларни ҳал этиш устида иш олиб борилмоқда.
