Индонезия пойтахти Жакарта шаҳрида велоспортнинг трек йўналиши бўйича Осиё чемпионати бўлиб ўтмоқда. Кеча ўсмирлар ўртасидаги беллашувларда ўзбекистонлик Янина Кускова гуруҳ баҳслари саралашида иштирок этди. Бу ҳақда МОҚ матбуот хизмати хабар берди.
Мусобақа якунларига кўра Гонконг вакиласи С.Ли биринчи ўринни қўлга киритди. Кумуш медалга эса 8 очко жамғарган Янина Кускова сазовор бўлди. Учинчи ўринни эгаллаган қозоғистонлик Эльвира Хамзина ҳам 8 очко тўплади. Ўзбекистонлик велоспортчи бугун яккалик пойгаларида ҳам медаль учун курашга чиқади. Кускова 3−4-ўринлар учун ҳиндистонлик спортчи билан беллашади.
Шунингдек, Мурод Холмуродов ҳам омниум йўналишидаги пойгада қатнашади. Аввалроқ гуруҳ пойгаларининг «Point Race» йўналишида олтин медални қўлга киритган Ольга Забелинская яккалик баҳсларида 1−2-ўринлар учун стартга чиқади.
