Россиялик тадбиркор ва дастурчи Павел Дуров Буюк Британия юридик шахслари реестридаги Telegram Messenger LLP компаниясини тугатиш ўғрисида ариза берди. Тадбиркор томонидан 19 декабрда имзоланган аризада компанияни рўйхатга олишни тўхтатиш ва уни Буюк Британия юридик шахслари реестридан чиқариш илтимос қилинган.
РКБ сўров ўтказган экспертлар тугатиш жараёнини компаниялар гуруҳининг Telegram Messenger LLP Британ Виргин Ороллари (БВО) ва Белиз юридик шахслари томонидан таъсис этилгани билан боғламоқда. БВО қонунчилигида 2 январда кучга кирган ўзгариш кўплаб йирик компанияларни фаолиятини тузилмавий қайта ташкил этишга мажбур этмоқда. Мутахассисларнинг тахминларига кўра, юридик шахснинг тугатилиши шу номдаги мессенжер ишига таъсир қилмайди.
Telegram Messenger LLP 2014 йил февралида таъсис этилган. 2017 йилдан компания Россиянинг ахборот тарқатишни ташкил этувчилар реестрига киритилган бўлиб, у фойдаланувчилар ёзувларини дешифрофка қилиш учун маълумотларни ФСБга топшириши лозим.
2018 йил апрелида Telegram ФСБ талабини бажаришдан бош тортгани учун суд қарори билан Россияда блокланди.
