Ўзбекистон Давлат солиқ қўмитасида фуқароларнинг банк карталаридан қарзларни сўзсиз ундириш тўғрисидаги низом лойиҳаси учун жавобгар бўлган бошқарма бошлиғи ишдан бўшатилди, дея хабар қилди ДСҚ матбуот хизмати «Газета.uz"га.
17 декабрь куни норматив-ҳуқуқий ҳужжатлар муҳокамаси порталида эълон қилинган қарзларни ундириш механизмини ифодалаган низом лойиҳасига 57 та танқидий фикр ва таклифлар билдирилди. Ҳужжат интернетда қизғин муҳокамаларга сабаб бўлди. Марказий банк ҳам бунга қарши чиқиб, банк карталаридан солиқ қарздорлигини сўзсиз ундириш бўйича қонуний механизмлар йўқлигини маълум қилди.
Жамоатчилик фикрини ўрганишда лойиҳа маромига етказилиб ишлаб чиқилмагани, жумладан унда ДСҚ раҳбарияти тавсиялари ва танбеҳлари ҳисобга олинмагани, муҳокамалар порталига рухсатсиз чиқарилгани аниқланди.
ДСҚ раҳбарияти жисмоний шахсларга қулайлик яратиш учун қарзларни солиқ инспекцияларига бормаган ҳолда тўлаш учун шароитлар яратишни таклиф қилган. Бунинг учун солиқ қарздорлигини тўлаш учун маълум миқдордаги маблағни ечиб олиш тўғрисида тўловчининг ёзма розилигини олиш режалаштирилган, дея хабар қилди қўмита матбуот хизмати.
Мазкур таклифлар низомда ўз аксини топмаган. Йўл қўйилган хатолар ва масъулиятсизлик учун низом лойиҳасини ишлаб чиқишга масъул бошқарма бошлиғи вазифасидан озод қилинган.
ДСҚ ҳозирда ҳужжатни қайта кўриб чиқмоқда. Унда жисмоний шахслар банк карталаридан фақатгина уларнинг розилиги билан қарзларни ечиб олиш кўрсатилиши кутилмоқда.
Қайд этиш жоизки, президент ўтган йил июнида имзолаган солиқ органлари фаолиятини такомиллаштириш тўғрисидаги ҳужжатда солиқ тўловчи жисмоний шахсларга хизмат кўрсатувчи банк карталари банк ҳисоб рақамларидан юзага келган солиқ қарздорлигини (ойига ЭКИҲнинг 2 баробаригача) сўзсиз ундириш ҳуқуқини бериш кўзда тутилган эди. Давлат раҳбарининг 26 декабрдаги янги қарори билан мазкур норма 1 январдан ўз кучини йўқотди.
