ЯИДХПда «Эски намунадаги миллий ҳайдовчилик гувоҳномаларини янги намунадаги миллий ҳайдовчилик гувоҳномаларига алмаштириш учун мурожаат юбориш» янги интерактив хизмати ишга туширилди. Бу ҳақда Norma.uz хабар берди.
Вазирлар Маҳкамасининг 2017 йил 2 мартдаги 116-сон қарорига мувофиқ, ҳайдовчилик гувоҳномаларини 2020 йилгача алмаштириш зарур. Дубликатни қандай олиш, алмаштириш ёки расмийлаштириш тўғрисида Вазирлар Маҳкамасининг 2018 йил 31 майдаги 408-сон қарори шарҳида ўқинг.
Шуни қайд этиб ўтамизки, айни пайтда ҳайдовчилик гувоҳномаларини қуйидаги Давлат хизматлари марказларида эксперимент тартибида алмаштириш мумкин:
Минтақа | Давлат хизматлари марказининг номи |
Тошкент шаҳри | Миробод, Чилонзор, Олмазор, Юнусобод, Мирзо Улуғбек, Учтепа, Шайхонтоҳур, Яккасарой ва Яшнобод туманларининг Давлат хизматлари марказлари |
Тошкент вилояти | Чирчиқ шаҳар Давлат хизматлари маркази |
Наманган вилояти | Наманган шаҳар Давлат хизматлари маркази |
Самарқанд вилояти | Самарқанд шаҳар Давлат хизматлари маркази |
Сурхондарё вилояти | Термиз шаҳар Давлат хизматлари маркази |
Фарғона вилояти | Қўқон шаҳар Давлат хизматлари маркази |
Бухоро вилояти | Бухоро шаҳар Давлат хизматлари маркази |
Ҳайдовчилик гувоҳномаси доимий прописка қилинган минтақадаги юқорида кўрсатилган Давлат хизматлари марказларида алмаштирилади. У ерда ҳайдовчилик гувоҳномаси алмаштирилмаётган бўлса, мазкур давлат хизматидан фойдаланиш учун ДЙҲХХ ҳудудий органларининг рўйхатдан ўтказиш ва имтиҳон олиш бўлинмаларига мурожаат қилиш зарур.
ЯИДХПдаги янги интерактив хизмат вақтни анча тежаш ва эски ҳайдовчилик гувоҳномаларини янги намуналарига алмаштириш учун ариза топширишни соддалаштириш имконини беради. Ундан фойдаланиш учун юридик ёки жисмоний шахс қуйидагиларни амалга ошириши зарур:
ЯИДХПда зарур маълумотларни кўрсатган ҳолда ариза шаклини тўлдириш;
ЯИДХПда берилган шакл билан 7 кун ичида ҳужжатларнинг асл нусхалари (паспорт; эски ҳайдовчилик гувоҳномаси ва талон) билан Давлат хизматлари порталига келиш;
давлат божи — ЭКИҲнинг 70 фоизини тўлаш, суратга тушиш ва янги ҳайдовчилик гувоҳномасини олиш.
