Ўзбекистон учун экстремизмга қарши курашда унинг оқибатларига қарши кураш эмас, балки профилактика чоралари устувор аҳамиятга эга, деди мамлакат бош прокурори ўринбосари Эркин Юлдашев. У бу ҳақда 19 декабрь куни бўлиб ўтган Халқаро пресс-клуб мажлисида маълум қилди.
Бош прокурор ўринбосарининг таъкидлашича, мамлакатда одамлар синчковлик билан ўтказилган терговлар натижасида ҳуқуқни муҳофаза қилиш органлари назарига тушади. «Аввалдан тасдиқланган шаблон бўйича далил-исботларсиз тузилган экстремизм таъсиридаги шахслар рўйхати мавжуд эмас», — дея қўшимча қилди у.
«Табиийки, экстремизм элементлари бўлган қайсидир жиноят ишлари биргаликда тергов қилинади. Аммо бу улар умумий характерга эга дегани эмас. Бизда, мамлакатимизда бундай вазият йўқ», — дея таъкидлади Эркин Юлдашев.
Декабрь аввалида Ўзбекистон президенти Шавкат Мирзиёев республикада диний-экстремистик ташкилотларга аъзо бўлганликда гумонланган 20 мингдан ошиқ киши ҳуқуқни муҳофаза қилиш органлари рўйхатидан чиқарилганини маълум қилган эди. Жорий йилда тақиқланган ташкилотлар фаолиятида иштирок этганлиги учун қамалган 646 киши жазони ижро этиш муассасаларидан озод қилинди.
