Бугун Жисмоний тарбия ва спорт вазирлигида Италиянинг «Ювентус» клубининг брендни бошқариш ва ривожлантириш бўйича ижрочи директори Каролина Киапперо бошчилигидаги делегация билан учрашув бўлиб ўтди. Бу ҳақда вазирдик матбуот хизмати хабар берди.
Ўзбекистонга ташриф буюрган Италия футбол клуби вакиллари билан ўтказилган музокаралар жараёнида Турин политехника университети кампуси базасида «Ювентус академияси"ни ташкил этиш бўйича музокаралар олиб борилди.
Жисмоний тарбия ва спорт вазирлигида бўлиб ўтган учрашувда ҳам томонлар Ўзбекистонда футболни оммалаштириш, янги ташкил этилаётган академия фаолиятини самарали йўлга қўйиш ҳамда ўзаро ҳамкорликни кучайтириш масалаларини муҳокама қилишди.
«Ювентус» клубининг брендни бошқариш ва ривожлантириш бўйича ижрочи директори Каролина Киапперо Ўзбекистонда академияни ташкил этишдан мақсад фақатгина унинг ўқувчиларини тайёрлаш эмас, балки ўзбек ёшларига футбол билан профессионал тарзда шуғулланиш имкониятини яратиш эканлигини маълум қилди.
Бугунги кунга келиб «Ювентус академияси» лойиҳаси Европа, Осиё ва Америка қитъасида жойлашган 49 та мамлакатда амалга оширилиб, 100 дан ортиқ ҳудудни ва 15000 нафардан ортиқ болаларни қамраб олган.
