Профессионал боксда фаолият олиб бораётган ўзбекистонлик спортчи Санжар Раҳмонов бугун Лас-Вегасда навбатдаги жангида рингга кўтарилди.Бу ҳақда МОҚ матбуот хизмати хабар берди.

Бу сафар боксчига америкалик Жонатан Стил рақиблик қилди. Саккиз раундга мўлжалланган жанг тўлиқ давом этди ва ғолиб очколар ҳисобига кўра аниқланди. Тўқнашув якунига кўра ҳакамлар бир овоздан Санжарнинг 77:75, 77:75, 78:74 ҳисобида ғалаба қозонганини қайд этди.

Маълумот учун, бугунги тўқнашув Санжар учун профессионал боксдаги 13-жанг бўлди. Раҳмонов уларнинг 11 тасида ғалаба қозонган (5 таси нокаут эвазига). Битта жангда дуранг ва яна бирида мағлубият қайд этган.

Жонатан Стил эса профессионал боксдаги 11-жангида рингга кўтарилди. Ушбу жангларининг 8 тасини ғалаба билан якунлаган (6 таси нокаут). Битта жангда дурангга эришган. Бугунги мағлубият эса Стил учун фаолиятидаги иккинчиси бўлди.