Самарқанд автомобиль заводи Тошкентдаги биринчи Made in Uzbekistan кўргазмасида автобус ва юк машиналарининг янги моделларини тақдим этди, дея хабар қилди компания матбуот хизмати «Газета.uz"га.

Шаҳар ичида ҳаракатланишга мўлжалланган янги SAZ HC45 автобуси Isuzu NPR82 шассиси базасида ишлаб чиқарилган бўлиб, сиқилган табиий газда (CNG) ишловчи двигатель билан таъминланган.

Автобуснинг йўловчи сиғими 39 кишини, йўловчилар ўриндиқлари сони эса 18 тани ташкил этади. Машина 130 от кучига эга Isuzu 4HV1 двигатели билан жиҳозланган. Умумий сиғими 300 л бўлган иккита газ баллонига эга.

Завод Евро-3 ва Евро-5 экологик стандартларига жавоб берувчи N ва F серияли юк автомобилларининг янгиланган қаторини ҳам тақдим этди.

Фургонли Isuzu NPR75K модели 155 от кучига эга механик тезлик узатмалар қутили двигатель билан таъминланган бўлиб, тўлиқ вазни 7,5 тоннани ташкил этади. Кабинаси ностандарт рангда — кумушсимон металлик.

240 от кучига эга, механик тезлик узатмалар қутили Isuzu FVR34Q юк машинасининг тўлиқ вазни эса 17 тоннадан иборат.

Яна бир янги самосвал — Isuzu CYZ 390 от кучи қувватга эга механик тезлик узатмалар қутили двигателга эга бўлиб, тўлиқ вазни 33 тоннани ташкил этади. Заводда 2008−2009 йилларда каттароқ самосваллар ишлаб чиқарилган эди, талаб борлиги муносабати билан серияни ишлаб чиқаришга қайтаришга қарор қилинди.

Компания сиқилган газда ҳаракатланувчи Isuzu NPR82 юк машинасини ҳам тақдим этди. Мазкур моделдаги машина илк бор 2013 йилда чиқинди ташувчи бўлган, кейинчалик юк (фургонлар, бортлар, самосваллар) ва махсус (ассенизаторлар) ҳисобига унинг сафи кенгайтирилди.