«Ўзбектелеком» компанияси халқаро интернет канали ўтказувчанлиги 10 баробарга — йил бошидаги 110 Гбит/дан 1200 Гбит/с га қадар оширилгани тўғрисида хабар қилди. Бу ҳақда жума куни АТ ва коммуникацияларини ривожлантириш вазирлиги анжуманида маълум қилинди.
«Ўзбектелеком» орқали барча провайдерларга етказиладиган интернет тезкорлигини ошириш учун тармоқ модернизация қилиниб, янги ускуналар ўрнатилди.
Йил бошидан «Ўзбектелеком» операторлар ва провайдерлар учун интернет канали тарифлари қийматини 1 Мбит/с учун 244,9 минг сўмдан 169,4 минг сўмга туширган бўлса, декабрда у яна 85 минг сўмга пасайтирилади.
Фойдаланувчилар учун интернет хизматларининг якуний нархлари миллий оператордан канал сотиб олган муайян провайдерга боғлиқ бўлади. Ҳар бири нархларни мустақил белгилайди, тезлик эса технологик уланиш ва тармоқнинг техник имкониятларига боғлиқ бўлади, дея хабар қилди «Ўзбектелеком».
1 декабрдан «Ўзбектелеком» Uzonline абонентлари учун «ҳақиқий лимитсиз» янги тариф режаларини тақдим этади.
