«Ўзбекистон ҳаво йўллари» Миллий авиакомпаниясининг HY272 рейс билан Истанбулдан Тошкентга парвоз қилувчи самолёти двигателига қуш урилгани сабабли уча олмади. Бу ҳақда авиаташувчи матбуот хизмати хабар қилди.
Boeing 767 самолётининг носоз экани ҳаво кемасининг HY271 рейси билан Тошкентдан Истанбулга учиб келганидан сўнг аниқланди. Самолётни кўрикдан ўтказишда қуш урилиши натижасида вентиляторнинг икки дона курагига шикаст етгани аниқланди.
Шикастланган самолётни таъмирлаш учун зарур ускуна ва эҳтиёт қисмлар тунги рейс билан Тошкентдан Истанбулга етказилади. Улар олинганидан сўнг самолёт яқин муддатларда фойдаланишга топширилади, дея қайд этди компания.
HY272 рейси носозлик тўлиқ бартараф этилгунига қадар ушлаб турилади. Йўловчилар меҳмонхонага жойлаштирилди.
